Lovísa Kristjánsdóttir

2003-06-05T06:52:00.000-07:00

Skyldi þetta blogg fara inn á Netið? Það lítur út fyrir að ég hafi ekki verið iðin við bloggið undanfarið. Sumpart rétt - ég hef verið upptekin af verkefni sem ég tók að mér að vinna og ljúka fyrir mánaðarmót. Það hafðist með mikilli vinnu, miklu álagi og litlum svefni. Inn á milli reyndi ég árangurslaust að blogga og lagfæra verkefnin mín og ljúka lokaverkefninu. Ekkert af því sem ég skrifaði á bloggið fór inn - sem betur fer á ég sumt af því í word skjali, annað var skrifað í stundarbræði þegar allt var mér mótdrægt. (Eins gott að það fór ekki inn.) Það var mér líka til ama að síður Norðurlandaráðs virkuðu ekki í nokkra daga svo ég fór að gera annað lokaverkefni um gönguferðir um borgina. (Vitið þið hvað það eru mörg útlistaverk hér í borginni? Alveg glás - en því miður eru allt of mörg þeirra ómerkt.) Sem betur fer komst tenging Norðurlandaráðs í lag og nú á ég eitt og hálft lokaverkefni. Í augnablikinu er ég með of lítið svæði svo það er ekki pláss fyrir lokaverkefnið um norræna samvinnu. Samt er það bara pínulítið en ég er með áform um að byggja það áfram og nota í kennslu í áfanga. Sem betur fer er gott fólk með mér hér á námskeiðinu sem veit við hverja maður á að tala við til að kippa í spotta (eða ýta á takka) og fá stærra svæði hjá Ísmennt.
Staðbundna lotan í gær hjá Láru var góð að mínu mati. Hún hélt sig við efnið, það eru nýmæli miðað við hvað gert hefur verið í öðrum kúrsum. Ég er líka sammála því sem kom fram í gær um að staðbundnar lotur hafi takmarkað gildi. Því miður hafa þær verið heldur ómarkvissar hingað til.
Ég ætla að fara að grenja út stærra svæði og glíma við að koma lokaverkefninu á vefinn. Það er komin tími til að kveðja þetta blogg og þakka ykkur öllum fyrir samveruna. Það er búið að vera frábært að kynnast svona góðum samnemendum og ganga í gegn um súrt og sætt með ykkur. Án ykkar hefði ég ekki lifað af.

2003-05-17T15:58:00.000-07:00

Nú er önnur myndin um Guðföðurinn að byrja svo bloggið verður ekki langt. Þessa mynd ætla ég að sjá, ég sá hana fyrir löngu síðan en er búin að gleyma henni. Ég er búin að sitja við lokaverkefnið í allan dag og þetta mjakast mjög hægt áfram. Sumar vefsíðurnar sem ég þarf að nota eru mjög þungar. Það tók meir en 10 mínútur að opna vefsíðu Norrænu ráðherranefndarinnar og næstum annað eins að fletta á milli. Vesen. Þetta á allt að vera mjög einfalt í sniðum en eins og þið vitið þá er hið einfalda svo erfitt. En nú ætla ég að njóta kvikmyndarinnar, mér finnst svo gaman að sjá bíomyndir. Mér er sagt að ég sé kvikmyndafíkill með vondan smekk!

2003-05-16T19:11:00.000-07:00

Það er alltaf svo skemmtilegt að bíða eftir að þessi síða birtist á blogginu hjá mér. Ég veit aldrei hvort letrið hér fyrir neðan ritunardálkinn er læsilegt eða bara fullt af óskiljanlegum táknum. Í gær var allt í lagi en núna eru bara kassar og hinir og þessir bókstafir ýmist feitletraðir eða ekki og stöku orð læsileg. Það þýðir að ég get ekki sett inn tengingu - reynslan hefur kennt mér það - svo núna ætla er ég ekki að hafa fyrir því, tengingin kemur ekki til með að virka. Góð afsökun!
Loks "faldt femören" og ég fattaði út á hvað lokaverkefnið á að ganga. Ég er búin að vera að vesenast með lokaverkefni sem ég ætlaði að tengja öðrum verkefnum en vandinn var sá að þá þurfti ég að gera gagnvirkar síður og slíkt kann ég ekki. En í nótt þegar ég lá andvaka fór að rofa til í kollinum á mér, þegar hugsunin var orðin sæmilega skýr sofnaði ég og vaknaði með óljósa hugmynd til að vinna eftir. Ég ætla að taka fyrir Norræna samvinnu - eða þannig. Svo sátum við Gerður fyrri part dags og fórum yfir viðmið og gátlista af vefnum frá Þuríði. Við það varð hugsunin afskaplega frjó en mér tókst samt ekki að gera neitt vitrænt í verkefninu. Þess í stað fór ég að skoða gömul verkefni um skipulag námskeiðs á Neti og lagfærði útlit og framsetningu á áfangalýsingunni í kvikmyndaáfanganum mínum. Ég er búin að vera í allt kvöld að breyta “lúkkinu” meðan ég horfði með öðru auganu á “The Godfather” sem ég hef séð margoft. (Frábær mynd!) Núna er framsetningin á áfanganum mun skárri hjá mér af því ég leitaði mér að nothæfri fyrirmynd og svo tengdi ég og setti á Netið og þá fór allt í flækju. Ekkert virkaði, réttu síðurnar birtust ekki -í besta falli einhverjar aðrar síður. Ég kann ekki að tengja! En nú er kominn tími til að hætta þessu rausi og vona að tengingarlausnin birtist mér í draumi. Morgundagurinn verður helgaður Norrænni samvinnu og það er vel við hæfi því 17. maí er þjóðhátíðardagur Norðmanna

2003-05-15T15:17:00.000-07:00

Ég er búin að vera að lesa blogg og allir eru svo duglegir og jákvæðir en ég er öll í mínus með lokaverkefnið, það er jafn óburðugt sem fyrr. En veðrið var gott og mér fannst rosalega gaman að hitta gamla kollega í dag þegar ég þurfti að fara upp í FB. Ég er búin að heimsækja svo marga skóla í vetur að ég fer að geta gert vísindalega úttekt á kennarastofu kaffi. Hvernig það er að styrkleika, hvernig það er borið fram, bollarnir í sumum skólum eru merktir eigendum sínum. Svo er misjafnt úr hverju fantarnir eru, glerjuðum leir eða gleri. Mér sýnist að bollar með undirskálum séu ekki notaðir lengur á kennarastofum. Í einum skóla var mér bent á að þar væri boðið upp á tvenns konar kaffi - önnur kannan var fyrir alvöru kaffineytendur. Já, kaffið í þeirri könnu fær hæstu einkunn, ég fékk mér eina "sneið" af því.
Núna er ég að drepa tímann, hef ekki þrek til að takast á við verkefnin, hvort heldur það eru skólaverkefni eða heimilisstörf. Drengurinn er í prófum og við foreldrarnir höfum verið að hjálpa honum. Ég er búin að lofa því að vera ekki að nöldra en mikið rosalega bjóðum við börnunum okkar lélegar kennslubækur og verkefni. Mér finnst sorglegt að sjá að á svokallaðri "tölvuöld" virðast kennslubækur endurprentaðar gagnrýnislaust án þess að lagfæra atriði sem eru úr sér gengin eða villur.
Svo fékk ég tölvupóst frá Láru - ég var alveg búin að gleyma því að ég hafði skráð mig í kúrs hjá henni. Hún lofaði að kúrsinn ætti að vera skemmtilegur. Mér finnst það vera göfugt markmið. Fleiri áfangar eiga að hafa það sem aðalmarkmið að vera skemmtilegir. Það var yfirlýst stefna í kvikmyndaáfanganum mínum sem ég kenndi í fyrravetur að námið ætti að vera "en nydelse". Makalaust hvað maður lærir miklu meir og betur þegar það er gaman.

2003-05-12T15:24:00.000-07:00

Hvað þýðir "FTP error occurred"? Þetta kemur þegar ég reyni að setja ákveðnar myndir inn. Við náum ekki nema hluta myndanna þegar við flettum upp á síðunum. Í barnaskap mínum hélt ég að e.t.v. væru of margar myndir á síðunni og reyndi að setja e-s konar framhaldssíðu upp með þeim myndum sem koma ekki upp. En nú kemur bara "An FTP error occurred" og ég er engu nær. Getur einhver upplýst mig?
Að öðru leyti er ég í hvíld frá verkefnavinnu. Ég er búin með öll verkefnin nema lokaverkefnið það verður tengt metacognition og sjálfsmati nemenda og á að tengjast hinum verkefnunum. Hvernig það tekst er annað mál.

2003-05-07T09:52:00.000-07:00

Klukkan á blogginu er vitlaus. Það er 16:48 (4:48 ef maður notar ekki "military hours") en ekki 6:48 PM. Það er meginlandstími í Evrópu og ég miðaði bara við þann tíma um síðustu helgi. Nú vil ég fá íslenskan tíma - líka á bloggið.

2003-05-07T09:48:00.000-07:00

Eftir hressandi göngutúr er e.t.v. ráð að huga að verkefnum og bloggi. Ég var svo stolt af mér í gær þegar ég var búin að búa til heila síðu af myndum og tengja þær við heimasíðuna mína til bráðabirgða. Svo kemur í ljós að þeir sem skoða síðuna úti í bæ fá bara hluta myndanna upp stundum kemur bara innrammað X. Hvernig getur það staðist þegar allar myndirnar eru eins settar inn, eru í réttri möppu og opnast allar hjá mér. Getur einhver útskýrt þetta? Hvernig er hægt að lagfæra svona? Get ég lagfært þetta þegar allt virðist vera í lagi í Dreamweaver hjá mér?
Svo veit ég ekki heldur hvernig á að setja mynd í word-formi inn á netið. Hvernig gerir maður það? Ég á ljósmynd sem ég hef skannað og hún er vistuð í word formi. Hvernig get ég notað hana?
Ég er að bjástra við að gera fjölvalsspurningar í Hot-Potatoes og kerfið vill bara leyfa mér að gera þrjár spurningar svo vilja þeir skráningu og lykilorð. Ég er búin að gera nokkrum sinnum þrjár spurningar. Þetta er pirrandi, það er svo langt síðan ég hef fiktað í Hot-Potatoes að ég man ekkert. Ég bara fékk forritið í skólanum - fullkomlega löglega - til að setja inn á mína tölvu. Svo þarf auðvitað að tengja þetta við vefsíður og það er víst ekki á færi allra. En getur einhver svarað mér því af hverju ég get ekki gert ótakmarkaðan fjölda af fjölvalsspurningum í Hot-Potatoes?
Getur einhver leyst þessi vandamál mín?
P.S. Bloggið er bjagað og ólæsilegt en áðan þegar ég opnaði tölvuna án þess að skrifa nokkuð á bloggið var letrið í lagi. Og af hverju var dagsetningin vitlaus í gærkvöldi þegar ég setti inn á Bloggið? Ég er hætt að velta því fyrir mér hvers vegna ég losna ekki við auglýsinguna. Hún vill ekki fara og mér þykir hún bara sæt!

2003-05-06T15:47:00.000-07:00

Af hverju er dagsetningin í blogginu vitlaus? Það er ekki kominn 7. maí ennþá!

2003-05-06T15:46:00.000-07:00

5.5.03

Jæja, þá tekur hversdagslífið við aftur eftir skemmtanir og lúxuslíf í Brussel um helgina. Ég ætlaði að blogga í Brussel en fann ekkert athvarf til þess. Ekkert netkaffihús varð á vegi mínum (eiginmanni mínum til mikillar ánægju!)
Ferðin var frábær – borgin og umhverfið yndislegt. Ég hafði reyndar komið til Brussel áður en þegar maður er í fylgd með þeim sem eru gjörkunnugir staðháttum þá verður allt miklu skemmtilegra. Við vorum í veislum á hverju kvöldi og borðuðum á veitingastöðum þar sem Belgar borða en ekki bara túristarnir. En við vorum líka í guðdómlegri veislu í heimahúsi og á laugardaginn fórum við í dagsferð til Tervuren sem er fallegur lítill bær með skógi og skrúðgarði skammt frá Brussel. Þar fórum við í hressandi heilsubótargöngu og enduðum á þorpskránni. Á laugardagskvöldið var flott ljósasýning með tónlist á Grand Place i Brussel. Tónlistin var sett saman úr mörgum tónverkum, það var byrjað á 1812 forleiknum og líka endað á honum með fallbyssuskotum og látum. Þetta var rosalega flott. Við bjuggum á frábæru hóteli í miðborginni í hliðargötu við Grand Place. Er hægt að hugsa sér það betra?
Ég ætla að reyna að setja myndirnar strax inn í tölvuna og á netið fyrst og fremst til að göngufélagarnir geti séð þær. Við vorum öll meir og minna í kubbaleik með e-a tölvumyndavélakubba og vorum “picture plaque”.
Þótt ferðin hafi verið í alla staði frábært var ósköp notalegt að koma heim í nótt. Við flugum frá Amsterdam og inn í næturbirtuna yfir Íslandi. Þegar flugvélin tók að lækka flugið og við fórum yfir Grindavík held ég bara að ég hafi séð Kristínu Mogensen sitja við tölvuna sína og keppast við.
En mér er víst ekki til setunnar boðið, vefsíður krefjast endurvinnslu og lokaverkefnið...... þar er allt í steik. EN – fyrst ætla ég að reyna að gera eitthvað við þessar stafrænu myndir sem ég tók í ferðinni.
6.5. Og það tókst. Það er myndasíða í tengslum við index síðuna mína ef þið viljið sjá hvað það var gaman hjá okkur. En það var ekki auðvelt að gera þessa síðu og velja myndir. Þetta tók langan tíma, svo keyrði ég litlu fjölskylduna mína, son, tengdadóttur og barnabörnin út á Keflavíkurflugvöll. Nú sofa þau vært í Kaupmannahöfn og fara á morgun til Hamborgar. Ég get ekki sett tenginguna við síðuna inn sennilega af því bloggið er svo bjagað. Skítt með það þeir sem hafa áhuga geta fundið slóðina.

2003-04-29T06:23:00.000-07:00

Þegar maður þarf að forgangsraða og gera svo ótal margt fer maður að gera það ónauðsynlega - að lesa annarra manna blogg og setja einhverja vitleysu inn sjálfur. Ég er enn jafn mikið í mínus yfir lokaverkefni, ekki það að mig vanti hugmyndir en þær eru ekki í fókus. Ég held að ég sé búin að skipuleggja námskeið með netnotkun. Endurlífgaði áfangann um danskar kvikmyndir sem ég kenndi í fyrra með smá tilfærslum. Í fyrra var ég voða skipulögð í þessum áfanga þótt ég hefði aldrei tengt netnokun við kennslu áður. Komst svo að því að krökkunum fannst ekkert sérstaklega gaman að eyða tímanum á Netinu. Þau vildu frekar fleirir myndir. Svo var ég að reyna friða samviskuna með einhverjum verkefnum - flestum vondum og ómarkvissum. En núna á ég víst að kunna að búa til vefleiðangur og vefrall, verð ég þá ekki að nota það í þessu námsskipulagi mínu? Vefrall - vel á minst. Fyrsta vefrallið sem ég gerði er "YT" = búið að vera! Tíminn er hlaupinn frá því og listasafnið sem vefrallið fjallaði um hefur gert breytingar sem eyðilögðu sumar spurningarnar. Svona er lífið hverfult.
Dóttir mín og tengdadóttir eru báðar í prófum í HÍ núna og ég er að passa Símon sem sefur vært í augnablikinu. Mér er víst ekki til setunnar boðið, þarf að stytta buxur, ná bletti úr pilsi og gera ýmislegt þarflegt til að undirbúa skemmtanalífið um næstu helgi.

2003-04-27T14:07:00.000-07:00

Búin að redda þessu með F12 hnappinn. Sonur minn fjarstýrði mér á rétta leið. Hann reddaði líka símleiðis hvernig ég skyldi flytja textann yfir á nýju skilasíðuna mína. Ég breytti útlitinu SJÁLF og svo lenti ég í veseni að venju. Nú er komið endanlegt útlit á index síðu og skilasíðu. Hér með tilkynnist að ég aðhyllist kúbisma í vefsíðugerð. Er ekki fínt að kalla þetta naumhyggju? Svo hef ég líka fengið tölvufróða gesti sem eru sammála mér um "æalkgn aæoei vtraæowrfnvzxkcjvn alkrh væcklnfzkdjtv alsæijf szæljkfopq459q48u5tv ngiuhf"!!!!!! Eigið þið erfitt með að skilja þetta? Svona líður mér yfir verkefnunum núna. Best að halda áfram - ég á eftir að gera flest verkefnin upp á nýtt. Ég þarf að kíkja á slóðina hjá Nordisk film, skyldi hún enn vera í viðgerð? Hún er búin að vera í viðgerð síðan í janúar og hún hlýtur að fara að koma upp aftur fljótlega. Þetta er jú eitt af þekktustu og elstu fyrirtækum Dana. Ég held samt að ég haldi áfram með mín verkefni þótt Nordisk film sé í fríi.

2003-04-23T16:25:00.000-07:00

Hæ! Ég er farin að halda að "Big brother" vaki yfir blogginu og eyði flestu því sem ég skrifa þegar mikið liggur við. Í gær hvarf allt nöldrið mitt af blogginu um leið og ég ýtti á "Post & Publish" og ekki í fyrsta sinn sem það gerist. En núna er neyðarástand hér í Vesturbænum. F12 takkinn virkar ekki svo ég get ekki séð hvernig síðurnar verða á Netinu. Að sjálfsögðu get ég ekki frekar en venjulega tengst Netinu með fjöltengi Orkuveitunnar og er að nota símalínuna. (Tvöfaldur kostnaður - en þetta er jú dýr kúrs!)
Hvað get ég gert? Hefur einhver annar lent í þessum vanda? Sendið mér línu með leiðbeiningum ef þið vitið hvernig á að bjarga málunum og gera F12 takkann virkan eða komast framhjá því að nota hann. Ég er að reyna að redda vonlausu verkefnunum sem voru gerð áður en ég lærði að nota töflur. Mitt tímatal miðast við fyrir og eftir töflur en hjá flestum miðast tímatal við fyrir eða eftir Krist.
Svo var ég að lesa bloggið ykkar og fékk algjört áfall! Það virðast allir vera með allt á hreinu. Ekki ég! Hvað er til ráða?

2003-04-15T02:55:00.000-07:00

Hae! Thetta er frabaert bara ad setjast nidur thegar madur er buin ad fa nog af Picasso og fara inn á naesta kaffihús til ad blogga. Ég er ad taka mér langthrád frí og er hér (i kuldanum) i Barcelona med saumaklúbbnum. Thad er gott kompaní, laust vid staela en ekki laust vid hávada. Skyldi ég geta búid til eitthvad af thessum verkefnum sem ég á eftir um midaldra kerlingar í hópferd? Kennsluvefur, hvernig vaeri thad? Ingolfur er lika i Barcelona, skyldi hann hafa bloggad hédan? Thad var nu gott ad fá námsáaetlun um verkefni í stadbundnu lotunni, ég hefdi reyndar kosid ad fá thau i janúar en thad hlýtur ad vera eitthvad ad mér. Thetta er oerugglega eitthvad med hugsmídahyggju og nemandann í fyrirrúmi. Sem sagt láta nemandann í fridi thangad til annad verdur ekki umflúid. Nú aetla ég ad láta bloggid í fridi á sama hátt thangad til ég kem heim. Hafid thad gott á medan.
P.S. Thessi ferd mín núna hefur kennt mér ad blogga í útloendum, mér finnst thad nú hálfrar einingar virdi.

2003-04-10T15:49:00.000-07:00

Dyntirnir í þessu Fjöltengi mínu eru óþolandi. Nú hef ég verið meir og minna sambandslaus í nokkra daga en allt er í góðu lagi þegar ég nota bara netkortið í KHÍ. Þetta hefur eiginlega versnað eftir að viðgerðarmennirnir birtust til að lagfæra allt. Þetta eru hinir ágætustu menn og mér segir svo hugur að þeir vilji bara koma til að hitta mig og svo rugla þeir öllu kerfinu svo þeir geti komið aftur. Allir hafa skilið eftir miða með GSM símanúmerinu sínu sem ég má hringja í bæði á nóttu og degi!!!
Í dag lærði ég að "deyfa myndir" Það er e-ð svona með að "Feathers 30%". Ég bjó til jólakort, ekki er ráð nema í tíma sé tekið.

2003-04-06T13:50:00.000-07:00

Það er langt síðan ég hef bloggað. En það er ekki vegna þess að ég hafi ekki reynt - jú, nokkur blogg hafa farið í vaskinn, horfið, netsambandið hefur slitnað þegar síst skyldi og ég hef bara ekki nennt svona veseni. Afrek mín þessa vikuna hafa e.t.v. ekki verið til að státa af - og þó. Ég hafði föstudaginn til að helga mig tölvunni og verkefnum en í staðinn fór ég í bæjarrölt með vinkonu minni, við borðuðum vel, ræddum landsins gagn og nauðsynjar og síðast en ekki síst mátuðum við föt og versluðum!!! Um kvöldið hafði ég ekki snert tölvuna, en mikið var dagurinn andlega upplífgandi.
Á laugardaginn lærði ég mikið í vefsíðugerð, þökk sé Ingibjörgu Friðriksdóttur. Nú ætla ég að reyna að notfæra mér þessa kunnáttu.

2003-03-30T14:53:00.000-08:00

Ég er búin að vera í tölvuvandræðum í dag. Tölvupósturinn vill ekki alltaf hlýða mér og ég hugga mig við að hann vill heldur ekki hlýða dóttur minni og ekki er hægt að kenna henni um klaufaskap og kunnáttuleysi. Ég ætla að setja hér inn vangaveltur mínar sem ég sendi Salvöru í tölvupósti núna áðan og vona að einhverjir lesi þetta og skrifi kannski sínar hugleiðingar um sama efni á bloggið. Þetta er í framhaldi af fyrirspurn Gerðar um Power Point verkefnið. Mér finnst ég vera svolítið "paa gyngende grund" með það verkefni og þurfa að fá nánari upplýsingar.
Mér skilst að við eigum að gera Power Point glærur og svo á að taka okkur upp - á hvað? Myndband eða segulband? Til hvers?
Það væri gott að fá dæmi um notkun á slíku í kennslu til að geta séð betur hvað maður sjálfur vill fjalla um. Að mínu mati ræðst umfjöllunarefni okkar af því hvort við eigum bara að lesa inn á glærur eða hvort við eigum að vera myndefni og þá hvernig. Það ræður líka heilmiklu um hvernig við setjum efni á glærur. Ef við eigum að lesa inn efni þá þurfum við að semja "lestexta" en ef á að taka mynd af okkur að flytja fyrirlestur, þá semjum við "taltexta" eða stikkorð. Þetta er tvennt ólíkt og þess vegna finnst mér nánari útskýringar vera brýnar. Lengd verkefnis er líka grundvallaratriði (mínútur eða glærufjöldi), það stjórnar innihaldinu talsvert.
Það væri gott að fá heyra eitthvað um þetta og e.t.v. hvaða vangaveltur aðrir nemendur eru með. Er þetta verkefni alveg á tæru hjá öllum?

2003-03-27T14:00:00.000-08:00

Má ég benda ykkur á að lesa bloggið hennar Guðrúnar Angantýsdóttur frá í dag. Þar eru fínar vangaveltur um aðferðafræði eigindlegra rannsókna. Ætli það séu ekki margir að hugsa á þessum nótum núna.

2003-03-27T02:46:00.000-08:00

Við Gerður reyndum í gær að snúa myndum, deyfa þær og nota sem bakgrunn en óttalega var þetta óbjörgulegt hjá okkur. Eitthvað mjakast þetta áfram þó. En tengingarnar eru eins og garnaflækja. Lára komst ekki á síðuna mína og ég sem þóttist vera búin að gulltryggja að allt væri tengt. Eftir mikið vesen i morgun tókst þó að tengja síðurnar en hve lengi endist svona tenging? Þær hurfu ganske pent meðan ég var í fríi og hvað gerist núna?

2003-03-25T14:09:00.000-08:00

Í morgun komst ég að nokkru hræðilegu. Ég er búin að gleyma hvernig ég set efnið út á Netið!!! Ég reyndi að tengja vefleiðangur en ekkert gekk samt held ég að ég hafi gert allt eins og alltaf áður. Svo gerðist það að sumar af tengingunum á síðunum til Láru virka ekki lengur! Þær gerðu það upphaflega - og hvar eru hinir blaktandi fánar sem áttu að leiða inn á íslenska og danska textann???? Engu er hægt að treysta!
Annars fór dagurinn aðallega í að skrifa niður vettvangsrannsóknina og hugsa svolítið um greininguna. Seinnipartinn var ég að bjástra við matsverkefni og þarf að ljúka því sem fyrst. Ætli ég verði ekki að drífa mig og nota nóttina. Hver var að tala um að maður hvíldist í námsorlofi?

2003-03-24T16:11:00.000-08:00

Afrek dagsins er að fara í vettvangsathugun og skoða tölvunotkun nokkurra framhaldsskólanemenda. Ég er búin að sitja við og skrifa allt sem ég punktaði hjá mér og svo bætist við það sem rifjast upp fyrir manni við skriftirnar. Nú er að klára að skrifa vettvangsnóturnar o.s.frv. en samt held ég að ég reyni fyrst að sofa. Góða nótt.

2003-03-24T02:17:00.000-08:00

Þá er aftur komin venjuleg vinnuvika og ég er búin að komast að því að ég hef ekki verið nægilega dugleg að koma verkefnunum mínum út á vefinn. Ég er búin með ýmislegt eins og e-ð persónulegt og vefleiðangra en ég er ekki alveg dús við þessi verkefni. Hvað um það reyni að vera dugleg í þessari viku.
Það var dásamlegt að vera í Köben!!! Því miður var rosalega kalt en það er hægt að hlýja sér á veitingastöðum og kaffihúsum. Við vorum dugleg að fara á söfn. Núna er ég búin að sjá Frihedsmuseet ,
Kunstindustrimuseet og svo fórum við líka í Glyptoteket en þangað hef ég ekki komið í mannsaldur! Þetta er eitt flottasta safn sem ég hef séð. Margt gott getur nú komið af því að brugga bjór! Á föstudaginn fór ég í bíó og sá glænýja danska mynd, De grönne slagtere. Þessi mynd er enn eitt meistaraverk Dana í kvikmyndagerð, en e.t.v. nær hún ekki heimsmarkaði. Hún er stútfull af kolsvörtum húmor, frábærir leikarar og gerist eins og svo margar danskar myndir í matarlegu umhverfi. Myndin var frábær. Við og aðrir bíógestir veinuðum af hlátri og það er gott að hlæja þótt innhald myndarinnar hafi e.t.v. ekki verið aðhlátursefni.
En því miður tókst mér ekki að fá þær bækur sem ég var að leita að. Þær fjalla um “undrvisningsdifferentiering” og portfolio notkun en í staðinn fékk ég bækur um dyslexíu og próf. Það er fróðleg lesning, sérstaklega þessi með prófin hvað erum við eiginlega að hugsa þegar við búum til próf? Við eigum að hafa það mottó að vita alltaf hvað við erum að gera og þess vegna held ég að við getum lagt af öll eða lang flest próf.
Nóg í bili nú ætla ég að snúa mér að öðru. Skyldu tengingarnar koma rétt út á blogginu? Skrýtnu táknin eyðileggja allt.

2003-03-22T01:06:00.000-08:00

Eg bara vard ad prufa ad skrifa svona blogg i utløndum. Her i Køben er skitakuldi en eg se stafirnir a blogginu koma rett ut her a sidunni. Thad gera their ekki heima. Nuna sitja vafalaust flestir i tølvustofunni i KHI og eru ad frædast um Firewoerks hja Birni. Gangi ykkur vel!

2003-03-18T12:32:00.000-08:00

Stafirnir eru aftur orðnir að skrýtnum táknum og þá hlýtur tengingin líka að hafa farið fj... til. En skítt með það. Verkefnin fyrir Láru eru á skilasíðunni minni. Svo ætla ég að taka mér smá hlé frá vefsíðuvafstri - í fyrramálið flýg ég til Kaupmannahafnar!!!!! Ég kem heim á sunnudag og á mánudag hefst rannsóknarverkefnið! Það verður góð tilbreyting frá föndrinu hér. Njótið lífsins hér á blogginu á meðan.

2003-03-17T03:06:00.000-08:00

Ég gleymdi að setja tengingu í skilasíðuna mína þar sem verkefnin í þessari námslotu eru. Svo er það annað mál hvort tengingin virkar. Hér er engu að treysta þótt táknin séu horfin.

2003-03-16T08:53:00.000-08:00

Blogg 14.03.03
Þetta blogg er skrifað í áföngum frá 14.-16. mars af því sítengingin vill ekki alltaf hlýða mér. Hún slítur sambandið um leið og ég virkilega þarf á því að halda og allt fer fj... til.
Fy for den lede!
Ég er víst búin að segja að stafirnir á blogginu verða torkennilegir þótt þeir komi rétt út á vefsíðunni. Þetta hefur í för með sér að engar tengingar ganga upp. (Ég veit að tengingarnar eru réttar!) Þess vegna ætla ég að taka UT kaflann handa Láru burt héðan af blogginu og setja hann á skilasíðuna. Geri það um helgina þegar ég geng frá hinum verkefnunum sem eru enn hálf hrá.
Og núna um helgina hef ég verið að lagfæra verkefnin. Ég er enn svolítið treg að setja vefleiðangrana mína á Netið þeir eru hvorki fugl né fiskur. Verkefnin til Láru komast á koppinn í kvöld.
Í gær og í fyrradag hef ég verið á á “follow-up” námskeiði fyrir dönskukennara sem voru á námskeiði í Danmörku sl. sumar. Þá ákváðum við hvert fyrir sig eða í hópum að innleiða nýja kennsluhætti. Það sem við skráðum í ágúst sl. að við myndum gera í kennslunni var dregið fram og nú er komið að skuldadögum. Nú erum við að skiptast á skoðunum, vega og meta og læra af reynslunni hvert hjá öðru.
Kennararnir eru ekki af verri endanum, Michael Svendsen Pedersen lektor við Roskilde Universitet, en hann hefur m.a. skrifað bækur um notkun upplýsingatækni í kennslu og hinn kennarinn er Leni Dam en hún er hugsuðurinn og hugmyndafræðingur á bak við “learner autonomi” sem gengur út á sjálfstæði og ábyrgð nemenda á eigin námi. Þótt ég taki fram enska heitið á þessu fyrirbæri á það rót sína að rekja til Danmerkur. Hún hefur líka notað portfolio í kennslu lengur en nokkur annar og er sérfræðingur á því sviði. Þar sem ég hef ekki verið í kennslu í vetur hef ég ekki gert mikið af því sem ég setti á blað – og þó – sumt af því er að taka á sig mynd í vefverkefnum. Eitt af því sem við ræðum á námskeiðinu er portfolio og hvað maður þarf að hafa í huga þegar maður lætur nemendur gera protfolio. Kennararnir frá MA voru með góð sýnishorn af portfolio og log bókum frá nemendum sínum. Og með upplýsingatæknifróðan kennara og sérfræðing í autonomi og portfolio þá höfum við haft um nóg að tala. Það var sérlega gaman að máta fræðin og verklagsreglur við það hvernig við erum að gera log-bækur (bloggið) og portfolio möppur í okkar kúrs. Einn kennarinn nefndi skilamöppur nemenda sinna (=skilasíðurnar okkar) “skattekister”. Það var ágætis orð.
Þótt ég hafi mjög takmarkaða reynslu af portfolio sem kennari þá tel ég að núna sé ég komin með ómetanlega reynslu af að gera portfolio sem nemandi. Það verður praktískt þegar ég fer aftur í kennsluna vegna þess að MH verður einn af portfolio skólunum næsta vetur.

2003-03-13T03:02:00.000-08:00

Bréf til Láru
UT2003. Ég hef valið að fjalla um fyrirlestur Ídu Semey um UT í spænskunámi og umfjöllun Ásrúnar Matthíasdóttur um vefsíður.

Ida Semey:
Hagnýting UT í spænskunámi

Ída er spænskukennari við MH og fjarkennari við VMA. Fyrirlesturinn var sérlega góður og fluttur á mjög afslappaðan hátt eins og hennar er von og vísa. En það var einmitt þráðurinn í erindi Ídu að kennarar verði að vera afskaplega rólegir þótt þeir hafi ekki fullkomið vald á tölvunni og tækninni.
Að hennar mati getur upplýsingatæknin og kennslubókarnotkun farið saman. Hún notar kennslubók í byrjendaáföngum en í næstu áföngum fléttar hún Netið sífellt meir inn í kennsluna í þemavinnu um ákveðin atriði. Strax í öðrum áfanga nota nemendur Netið markvisst og í efri áföngum er frekar möguleiki á að sleppa bókunum alveg. Hún gefur nemendunum ákveðið val um viðfangsefni en virðist samt stýra þeim með verkefnum inn á gagnlegar síður og verkefnin eru markviss til að nemendur týnist ekki bara í að leita.
Verkefnin hennar eru í senn hagnýt, fræðandi og menningarleg. Ákvörðun um viðfangsefni er líka sumpart í höndum nemenda vegna þess að þeir taka þátt í hugljómunarferli sem haft er í byrjun til að finna og velja efnisflokka til að fjalla um. Valfrelsi eða ímyndað valfrelsi er afskaplega hvetjandi þáttur í öllu námi.
Hún sagði okkur m.a. frá einföldum vefleiðangri sem gengur út á að versla og kaupa húsgögn í íbúð og öðrum sem fjallar um skipulagningu á ferðalagi. Viðfangsefni eldri nemenda eru e.t.v. ekki eins hlutbundin en afskaplega menningarleg og fjalla t.d. DonQuixote, Gaudi eða aðra snillinga.
Vefsíðurnar sem Ída bendir nemendum á eru ekki frekar en aðrar almennar vefsíður, gerðar fyrir nemendur með takmarkaða málakunnáttu en það virðist ekki aftra þeim frá að lesa sig í gegn um síðurnar.
Á vef spænskudeildar er málfræði og öll heiti eru á spænsku en ef maður rennir músinni yfir þá birtist íslensk þýðing á hugtökum. Ída setur líka inn orðaforða / glósulista til hægðarauka fyrir nemendur. Verkefnin geyma nemendur í möppum á sínu svæði í tölvunni, engin hætta á að þau krumpist eða týnist - en þetta gerir kröfur til nemenda um að vera nákvæm þegar þau vista skjölin sín. Sjálf notar hún
Angel kennsluumhverfi til “utanumhalds”. Angel er notað í nokkrum framhaldsskólum á landinu og er ættað frá FSu
Í lokin sagði Ída hvað yrði að hafa í huga þegar kennarar væru að fikra sig áfram með að nota UT í tungumálakennslu. Kennarar verða að vera opnir og tilbúnir fyrir kaos. Þeir verða líka að muna að þeir eru ekki alvitrir en þurfa að vera skapandi í hugsun.
Mér fannst þetta afskaplega fróðlegur og skemmtilegur fyrirlestur og ekki síst hagnýtur hvað varðar tungumálakennslu, því það sem hentar í einu tungumáli nýtist oftast líka í öðru tungumáli.

Ásrún Matthíasdóttir:
Úttekt á íslenskum vefsíðum

Það var fjölmennt í stofunni hjá Ásrúnu þar sem hún fjallaði um rannsókn sem hún ásamt nokkrum öðrum gerði á 40 íslenskum vefsíðum. Hún var að kanna uppsetningu og nýtingu á síðunum og í rannsóknina valdi hún m.a. síður frá stórum íslenskum fyrirtækjum, mest sóttu síðurnar og verðlaunaðar síður. Síðan var fundið út hve mikill hluti síðunnar væri nýttur og hvernig. Það var gert með því að “mála” síðurnar í ákveðnum litum kerfisbundið eftir flokkum og mæla hlutfall litanna sem táknuðu flokkana.
Viðmið voru fengin frá Jakob Nielsen sem mun vera mikill “gúrú” í fræðunum, þótt ég hafi aldrei heyrt minnst á hann áður. Stuðst var við rannsókn Jakobs Nielsens og Marie Tahir Homepage Usability 50 Websites Deconstructed. Mér fannst hins vegar gaman að heyra um kosti og galla á síðum skv. staðli JN. Æskileg uppsetning á síðum var eins og mér finnst þægilegast að sjá á síðum og ég veit fátt verra en t.d. fá “skvettusíður” sem JN mun heldur ekki hafa dálæti á. Eru viðmið hans fundin eftir könnun á því hvernig fólk vill hafa vefsíður eða eru lögð hönnunarleg viðmið til grundvallar?
Niðurstöður Ásrúnar sýndu að stór hluti af vefsíðum er auður. Það voru talsverðar umræður um ágæti þess að fylla síðurnar eða hafa “loft” á síðunum og mér fannst helst að sumum þætti viðmið JN ekki eiga við íslenskar síður og að við ættum að hafa sérstök viðmið. Má vera að þetta hafi verið minn misskilningur. Flestum fannst þó enginn galli að hafa tóm svæði á síðunum. Svo var komið með hugmyndir um ákjósanlega möguleika sem vefsíður ættu að bjóða uppá. Það þótti t.d. vera augljós kostur að geta stækkað letur á vefsíðum, bráðnauðsynlegt fyrir sjóndapra og einnig var nefnt að gott væri að geta breytt bakgrunnslit. Þeir sem glíma við lesröskun hafa sumir “The Irlen syndrome” og þá þarf að vera hægt að hagræða bakgrunnslit.
Fyrirlestur Ásrúnar var stuttur, hnitmiðaður og laggóður og miklar umræður á eftir. Það voru fyrirspurnir til Ásrúnar, menn voru að láta í ljósi sínar skoðanir og e.t.v. líka að sýna að þeir hefðu kynnt sér fræði Jakobs Nielsens. Fólk var líka að ræða sín á milli um útlit á síðum. Það virtist greinilegt að flestir voru með einhverja(r) síðu(r) í huga og voru að máta þær við viðmiðin.
Í umfjölluninni var nefnt að “logo” fyrirtækis ætti að vera efst í vinstra horni. Þá datt mér í hug hvort ekki þyrfti að færa MH – merkið til á heimasíðu skólans.

2003-03-12T05:00:00.000-08:00

Ég er líka ein af þeim sem ekki fatta verkefnið frá Láru. Tenging við lesefni ???? Hvernig, lesefni um hvað? Það er örugglega nóg til af lesefni um konur á fjaðurpennastiginu en ég get ekki ímyndað mér að það sé skemmtileg lesning. Svo finnst mér ég alltaf vera að skrifa um mig. Þetta er búið að vera ein eilífðar kynning frá því í haust.
Ég var að dunda mér við skrifa um UT ráðstefnuna en er ekki búin að koma henni á Netið frekar en vefleiðangrinum. En ég get glaðst yfir því að einn nemandi prófaði vefrall frá mér og er mjög ánægður með verkefnið. Vinkona mín hefur fengið nokkra af nemendum sínum til að gera mér þann greiða að prufukeyra verkefnin og koma með athugasemdir. Það er nauðsynlegt að fá svona "feed back". Mér finnst ég þurfa að fá "feed back" um það sem ég er búin að gera. Ef til vill er ég á algjörum villigötum með vefleiðangurinn. Og auglýsingin vill heldur ekki fara núna!

2003-03-09T12:26:00.000-08:00

Bara varð að prófa kaffiprófið! Og hér eru niðurstöðurnar - ég er:
Latte!
Þú ert skapstór og íhaldsamur einstaklingur sem lætur ekki bjóða sér hvað sem er. Undir vissum kringumstæðum leyfirðu þér að prófa nýjungar, en þó aðeins að vel athuguðu máli.

Passar lýsingin við mig? Að sumu leyti - nema að ég drekk ALDREI Latte! Á kaffihúsum fæ ég mér oftast Capuccino!
Gott hjá Rannveigu að setja þetta próf inn. Loksins eitthvað vitrænt og skemmtilegt!

2003-03-09T08:52:00.000-08:00

Það var ágætt að hittast í gær í KHÍ. Ég gerði samt ekki mikið, rembdist við að fylgja fyrirmælum um myndvinnslu en samt gekk þetta ekki alveg upp. Sko – fyrirmælin gera ekki ráð fyrir sjálfstsæðum skoðunum. Ég vil nota myndina sem ég finn á Netinu á ákveðinn hátt og í stað þess að fá eina mynd á síðuna mína þá fæ ég a.m.k. tvær ef ekki fjórar og ég get hvergi fundið nokkuð sem segir e-ð um hvað maður gerir undir slíkum kringumstæðum.
Ég er alltaf að pirrast á því hve mikil orka fer í útlitið á vefsíðunum og þá vill innihaldið óhjákvæmilega sitja á hakanum. Þess vegna er ég svo hrifin af svona samstarfi eins og hjá þeim stöllum í Álftamýraskóla.
Vefsíðan er dæmi um fagmennsku út í æsar. Önnur sér um útlitið en hin hugsar um innihaldið á síðunum – en að sjálfsögðu gengur svona ekki upp nema í miklu og góðu samstarfi.
Ég lagðist undir feld í gær og hugsaði í alvöru um hvort þessi kúrs yrði til þess að ég myndi notfæra mér Netið meir í kennslu og setja efni út á Netið. Ég held að ég geymi svarið með mér enn um hríð en þetta minnti mig óþyrmilega á að stundum er færni nemenda minna svo óburðug að þau geta ekki komið neinu frá sér á erlendu máli og ég berst við að kenna þeim ÞOLMYND! Skyldu þau nokkurn tíma geta nokkuð ef ég held áfram að þvælast í þolmyndinni?
Aftur á móti reyndi ég að hugsa um hvað ég vildi fá út úr þessum kúrs. Núna get ég búið til einfalda vefsíðu en í raun veit ég lítið um hvernig maður setur efni fram í þessum umbúðum. Eins og lang flestir kennarar hugsa ég í A4.
Ég vil læra e-ð um mismunandi framsetningu á efni eftir innihaldi. Sem sagt meiri tengingu við námsgreinar.
Ég vil læra að nota forrit eins og Hot Potatoes og geta tengt HP-verkefni við vefsíður. Ef þetta er í lagi þá held ég að ég geti bjargað mér með að halda úti efni á vefsíðu.
Svo væri gaman að geta sett inn teljara á síðurnar eða gestabók. Hvernig er það gert?
Ég hef áhuga á hvers konar “tölvuvæddu utanumhaldi”. Hvernig hefur maður stjórn á t.d. WebBoard fyrir nemendur sína? Hvernig get ég látið nemendur geyma verkefnin sín í möppum í tölvunum sem aðeins ég og þeir hafa aðgang að?
Það væri fróðlegt að vita hvað aðrir vilja fá út úr þessum kúrs. Mér finnst það alveg vera verðugt verkefni upp á t.d. hálfa einingu.

2003-03-07T01:54:00.000-08:00

Alltaf eru torkennileg tákn í stað bókstafa að þvælast hérna á Blogginu. Er enginn annar sem lendir í því? Ég er mikið búin að velta fyrir mér vefleiðangri og finnst að maður hljóti að þurfa að huga fyrst að útkomunni áður en maður leggur af stað. Er þetta bara enn ein leið til að skrifa ritgerð eins og ég hef séð í mörgum verkefnum? Ég er með mismunandi viðfangsefni í huga og ólíka markhópa og þegar ég pæli í þessu og miða við vefleiðangra sem ég hef séð og leiðbeiningar um hvernig skuli gera slíkt þá fæ ég ekki eina aðferð til að ganga upp fyrir ólík viðfangsefni. Markmiðið hlýtur alltaf að vera einhver útkoma, niðurstaða, lausn verkefnis eða breyting og ólíkar niðurstöður virðast kalla á mismunandi nálgun. Er ég komin á miklar villigötur?
Hvað um það – ég hlustaði á ágætis fyrirlestur í gær um tölvunotkun í dönskukennslu í Álftamýrarskóla. Erna Jessen dönskukennari sagði okkur frá hvernig hún notaði tölvur í kennslunni og sýndi heimasíðuna sem er unnin í nánu samstarfi við hana Þórunni okkar Traustadóttur. Það er alveg frábært hvað þær hafa gert. Fallegt fyrir augað og áhugavert. Ég ætla að setja tengingu hjá mér í þessa síðu. Svo kom Erna inn á þætti sem verður að hafa í huga. Tölvan hefur marga kosti en það má ekki gleymast að tölvan er tæki í tungumálanámi en ekki markmiðið í sjálfu sér. Ég sakna meiri tengingar við námsgreinar. Það sem gildir fyrir raungreinar á e.t.v. ekki við í tungumálum eða lesgreinum.
Þetta verkefni hefði átt skilið að fá hvatningarverðlaun fremur en önnur. En þar átti víst að senda inn umsókn til að koma til greina við úthlutun þessara verðlauna! Og þeir sem gera eitthvað af viti er svo fj... hógværir!

2003-03-05T06:33:00.000-08:00

Ennþá eru þessi sérkennilegu tákn í staðinn fyrir bókstafi í blogginu mínu, en á vefsíðunni er þetta allt saman læsilegt. Og auglýsingin fer ekki þrátt fyrir að ég margsetji allar greiðslukortaupplýsingar inn. Eftir að ég ýti á "enter" kemur bara síða sem segir að þessi síða sé útrunnin. (This page has expired!)
Þá er að huga að vefleiðangrinum. Svo áttum við að skrifa eitthvað fyrir Láru, en engin fyrirmæli hafa borist enn. Hver var að tala um að búið væri að setja upp Webboard fyrir okkur í NKN? Ég hef ekkert heyrt af slíku og enginn tölvupóstur borist lengi. En ég get glaðst yfir að Fjöltengið mitt virkar í dag.

2003-03-03T06:02:00.000-08:00

Það tókst heldur ekki núna að losna við auglýsinguna og ég prentaði út allar þær síður sem ég fékk sem svar.

2003-03-03T05:52:00.000-08:00

Ég ætla að reyna enn einu sinni að losna við auglýsinguna. Skyldi það takast í þetta sinn?

2003-03-03T02:34:00.000-08:00

Enn eru vandræði. Ég er búin að setja inn allar upplýsingar til að losna við auglýsinguna - (Ég er ekki enn búin að sjá tilganginn með því -en ég er nú svo treg!) - en þetta gengur ekki upp. Það kemur bara hið hefðbundna "This page cannot be dispalyed" um leið og ég ýti á enter með kortaupplýsingum. Reyni aftur seinna.
Þá er staðbundnu lotunni á Akureyri lokið. Á ég að hafa einhver orð um það? Akureyri er fallegur bær. Þangað hef ég eiginlega aldrei komið og aldrei svona hátt upp.
Það sem ég hef skrifað á Bloggerinn er rétt þar - en hér fyrir neðan er sambland af stöfum - orðum og ferningum í stað sumra stafanna. Ekki eingöngu broddstafa eða íslenskra stafa heldur bara tvist og bast. Skrýtið.

2003-02-27T01:47:00.000-08:00

Í gær var ég við uppbyggileg störf fram á kvöld. Þá kom Snorri, kunningi dóttur minnar í heimsókn. Hann er nebblega að læra tölvufræði í HR og vinnur við tölvur og vefsíðugerð. Það er eins og þegar þjáðir fá lækni í vitjun. Ég var búin að skrifa niður flest sjúkdómseinkenni mín og tölvunnar og hann gat bjargað ýmsu. (Mér er reyndar ekki viðbjargandi!) Svo fannst mér mjög gaman að fá loksins einhvern sem nennir að hlusta á vangaveltur mínar um hvernig ég á að gera vefsíður og enn frekar verkefni sem vit er í . Enginn á heimilinu nennir að hlusta á slíkt. Hér eiga tölvur að vera eins og bílar, ganga endalaust og skila manni áfallalaust á áfangastað. En það þarf ekkert að ræða um það. Þess vegna er gott að geta bloggað. Núna sé ég að tengingin hefur slitnað í fjórða eða fimmta sinn á klukkutíma og ég ætla að hringja í Orkuveituna og messa yfir þeim. Meðan ég man. Tengingin mín á verkefnunum í "sites" datt út og það þurfti að setja inn aftur. (Snorri bjargaði því!) Hefur einhver annar lent í því að tengingin dettur út? (Nú er ég búin að ýta tvisvar á "Post & Publish" skyldi þessi texti birtast tvisvar?)

2003-02-26T02:44:00.000-08:00

Það fer of mikill tími í þetta vefsíðuvesen. Í gær rembdist ég við að gera síðu en tíminn sem fer í að reyna að láta síðuna fá ákveðið útlit, myndir o.s.frv. er of mikill að mínu mati. Aðalatriðið er innihaldið og það þarf að hugsa vandlega. Vandinn er hins vegar sá að innihaldið getur verið dæmt af útlitinu. Engin nennir að leysa verkefni á ljótri vefsíðu. Í dag ætla ég að taka mér hlé frá "störfum" við tölvuna og láta liggja eitthvað eftir mig.

2003-02-25T01:36:00.000-08:00

Hér skal fært til bókar að í gær fiktaði ég í Fireworks í fyrsta sinn - en ætli ég sé ekki búin að gleyma öllu núna. Mínar pælingar snúast aðallega um verkefni á Netinu. Það hugnast mér ekki alveg að nota Netið sem eins konar uppsöfnun á slóðum og texta fyrir verkefni sem eru unnin í höndunum. Það er engin breyting önnur en sú að gagnasöfnun er fljótari. Mér finnst alveg ómögulegt að nemendur geti ekki leyst verkefnin jafnóðum á tölvu. Maður gæti notað Hot Potatoes og búið til próf o.þ.h. en hvernig er hægt að tengja það iðandi vefsíðu? Þarf alveg sérstaka kunnáttu til að gera svoleiðis eða forritun?????
Svo er önnur pæling - verkefni sem tengjast vefsíðum verða mjög fljótt úrelt. Þess vegna þarf maður að hugsa um verkefni sem tíminn hleypur ekki frá eða orða verkefnið þannig að spurningar gilda áfram þótt síðurnar breytist svolítið. Mér finnst líka nauðsynlegt að vita á hvers vegum vefsíðurnar eru og hvenær þær hafa verið uppfærðar. Ég sá góða síðu í gær en það hafði ekki verið hreyft við henni síðan árið 2000. Mér fannst síðan hljóta að vera vanrækt og hefði engan sem sýndi henni áhuga - þá missti ég áhugann líka.
Núna finnst mér kominn tími til að hugsa fyrir hvernig vefurinn minn mun verða. Hvaða síður tengjast og hvernig mun ég nota vefinn og hverjir munu hugsanlega nota hann. Á ég að hafa allt sýnilegt eða ......? Einu sinni fékk ég aðgangsorð að myndasíðu hjá vinafólki af því fyrsta barnabarnið þeirra fæddist. Þau vildu sýna mér myndir sem voru á Netinu en ekki aðgengilegar fyrir hvern sem er. Það er svolítið sniðugt. Á ég að gera svoleiðis? Þá þarf ég að kunna eitthvað meir.
Ég er búin að koma mér upp tilraunadýrum til að leysa verkefnin en mér er satt að segja meinilla við að láta nemendur komast inn á síðurnar meðan þær eru í smíðum. En ég verð að fá gagnrýni á verkefnin og hvað er betra en láta nemendur leysa verkefnin?
Enn ein spurning - getur einhver svarað því hvort við eigum að skrifa Netið með n eða N? Það virðist vera ýmist. Eina sem ég veit að á dönsku á að skrifa Internet með I. Sem minnir mig á að í Dreamweaver get ég ekki notað danska stafi - heldur ekki hér á blogginu. Það hlýtur að vera hægt að lagfæra það. Núna er ég að skrifa allt í Word og líma textann en það bjagast í Dreamweaver. Vesen.

2003-02-23T14:37:00.000-08:00

Núna líður mér vel! Ég er búin að búa til síður og tengja og setja myndir og litaðan bakgrunn!!! Mér finnst ég voða dugleg en samt eru vandræði. Ég fékk hugmynd um verkefni með dagblöð sem á ekki að geta orðið úrelt þótt fréttir blaðanna breytist. Mér tókst meira að segja að setja myndir í kant í ramma en svo þarf að margvista síðuna með rammanum og núna kemur ekki síðan með kantinum upp heldur bara verkefnið á lituðum grunni. Ég þarf að pæla í þessu og sennilega fleygja einhverju. Það er um að gera að vera bara köld og setja í ruslið. Átti ég að nota "frames" strax áður en ég setti inn texta eða ????
Það er auk þess komin röð og regla hjá mér - allt í möppum. Öðruvísi mér áður brá!
Ég hef ekki reynt við Fireworks ennþá enda vill það ekki virka hjá mér en fer vonandi að hlýða bráðum.
Svo er ég loksins farin að skilja í hverju vefurinn felst - að tengja saman síður. Það er skemmtilegt - þetta verður eins og þjóðvegakerfi á landakorti þegar allar tengingar verða komnar. (Bara ef ég þyrfti ekki að hugsa um e-ð útlit!)
Ég er að verða voða "hooked" á þessu vef-veseni. Fyrst var allt í steik og ekkert gekk þrátt fyrir þrásetur við tölvuna. Núna kann ég pínulítið og þá sit ég stöðugt við til að búa til meira. Og einmitt núna fékk ég hugmynd um kaflaskiptingu í léttum texta - prófa að nota töflur.

2003-02-18T14:42:00.000-08:00

Ég komst inn á ómyndina (MH heimasíðuna mína!) gegn um FTP og gat breytt - held ég. En ég gerði þetta ekki hjálparlaust. Dóttir mín og kunningi hennar sem er í HR höfðu hönd í bagga. Mér tekst þó ekki að nota sömu aðferð til að komast inn á ísmenntar síðuna mína. Síðan sem ég hef verið að bjástra við og var öll skökk og skæld með "layers" var orðin reglulega pen eftir að dóttir mín komst með puttana í hana. Allt jafnað og sett í ramma. Henni þótti alveg hræðilegt hve þetta var illa gert hjá mér. Ég fattaði útskýringarnar hjá henni þótt hún færi hratt yfir. Aðalatriðið að hennar mati er að búa til ALLAR síður strax og setja upp skipulag síðan er hægt að setja innihald og föndra betur við útlit. Þetta hentar mér ágætlega því ég verð að geta hugsað heildina, hvernig síður hanga saman og um hvað þær eiga að vera. Það sem ég hef áhuga á er innihaldið, útlitið verður að vera gott en mér finnst ekki gaman að föndra með þetta bansetta útlit. Það tekur of mikinn tíma frá aðalatriðum að mínu mati.
Svo fórum við að skoða heimasíður og þá benti hún dóttir mín mér á mjög einfalda leið til að gefa heimasíðum nafn ef það hefur gleymst. Fara í View og Source og finna html kóða með "untitled document" og setja heiti síðunnar inn í staðinn fyrir það milli táknanna. Hókus pókus og síðan hefur fengið nafn! Þetta skildi ég líka og er bara harla ánægð með mig.

2003-02-18T04:38:00.000-08:00

Svei mér þá - skyndilega gengur þetta allt svo hratt hjá mér. Skyldi það vera vegna þess að ég eyddi yfir 400 bréfum úr póstinum hjá mér í morgun?! Ég fleygi ekki tölvupósitnum mínum strax og svo hrúgast þetta upp! En núna er hólfið næstum tómt! Nýársheitið verður að eyða tölvupósti jafnóðum og setja í möppur það sem ég þarf að nota og vil eiga. En skyldi ég standa við þetta heit frekar en önnur?

2003-02-18T04:33:00.000-08:00

Í gær var tölvudagurinn mikli. Fyrst var farið í KHÍ til að láta setja upp netkortið sem er innbyggt í tölvuna. En viti menn, ekkert kort var innbyggt í tölvuna svo ég þurfti að fjárfesta í netkorti. Dóttir mín reifst við mig og sagði að það væri víst innbyggt netkort í tölvunni. Hún þóttist vita þetta allt. Mig minnti líka að sölumennirnir hefðu sagt að tölvan hefði innbyggt netkort en ég gat svo sem ekkert sannprófað það. Ég spurðist fyrir hjá Nýherja og þeir sögðust ekki hafa selt mér tölvu með innbyggðu netkorti. Því til sönnunar fékk ég samninginn þar sem er tiltekið hvaða hæfileikum tölvan er búin. To be or not to be - innbyggt netkort eða ekki. Hér er verið að nota sama hugtakið um tvo mismunandi hluti. Tölvan hefur innbyggt netkort því annars gæti ég ekki tengst fjöltenginu, farið á Netið og sent tölvupóst. En tölvan hefur ekki innbyggt þráðlaust netkort til að tengjast Netinu t.d. í KKÍ. Hvernig á svona forngirpur eins og ég að grípa þetta? Hvað um það ég er búin að fá þráðlaust netkort og sjaldan hefur sambandið verið betra en í gærkvöldi í Kennó.
Ég lærði alveg rosalega mikið í gær undir leiðsögn Fannýar. EN ég get ekki tengst ísmennt. Það er eitthvað vitlaust og ég veit ekki hvað það er svo ég get ekki spurt af viti. En svei mér ef ég skildi ekki bara pínu lítið í Fireworks líka.
Þessi staða að vera á byrjunarreit og vita ekkert hvað maður á að gera er pirrandi og maður vinnur ekki vel þegar manni líður illa.
Næsta skref mitt er að taka auglýsinguna burt þótt ég sé mjög sátt við að hafa hana þarna á blogginu. Hvers vegna á auglýsingin að fara???

2003-02-16T14:49:00.000-08:00

Sko það tókst! Myndin er komin á réttan stað, verður hún þá áfram þarna á sama stað eða hvað? Sjáum til. Næst er að losna við auglýsinguna. Hvaða möguleika á að velja? Ef ég vel ódýrasta kostinn get ég þá ekki sett myndir inn á bloggið? Getur einhver sagt mér það?
Ég ætla að fara að fikta við Dreamweaver og held að ég sé búin að fá mér bakhjarl til að aðstoða mig. Stóri sonur minn er afar þolinmóður sem er nauðsynlegur eiginleiki í samskiptum við tölvu. Ég er mjög óþolinmóð að eðlisfari, þess vegna pirrar það mig óskaplega að komast ekki áfram og sitja föst í tæknilegum atriðum sem ég hef lítinn áhuga á.

2003-02-15T10:40:00.000-08:00

Je minn!!!! Myndin er komin upp í haus eins og auglýsingin sem ég kann ekki að losna við. Nú þarf ég að flytja myndina, en hef ekki tíma til þess núna. Sennilega tekst þetta.

2003-02-15T10:36:00.000-08:00

Jæja, þá er enn einn laugardagurinn liðinn og ég er litlu nær. Jú aðeins - en það virkar ekkert. Ég er búin að reyna að herma eftir öðrum og svo bjástraði ég við að flytja myndina af mér upp í "hausinn" eða e-s staðar efst á blogg síðuna. Nú er ég farin að prófa að "kópíera" slóðina af síðum annarra til að gera eins. En það tekst bara ekki. Það er e-ð millistig sem ég þarf að fara í gegn um. Eitthvað með möppu og myndir. Ég þarf að búa til eina möppu enn og setja myndir í hana og síðan nota slóðina úr möppunni. Er þetta ekki rétt skilið hjá mér? (En ég kann ekki að búa til möppu!) Ég raða aldrei neinu. Ég er ekki "raðari". Það er ákveðinn tegund af fólki sem eru "raðarar". Ég er alltaf með allt í einni klessu hvort heldur það eru skápar fjölskyldunnar (sem eru ekki endilega á minni ábyrgð), skrifborðið mitt (það líkist venjulega stórslysi með fjallháum hrúgum af pappír og blöðum) eða tölvan - þar er desktop eins og skrifborðið mitt.
Ég fór í Ráðhúsið áðan. Eitthvað var þar um nýbreytni í skólastarfi. Þetta minnti helst á gömlu sýningarnar sem vour haldnar árlega í skólanum mínum, nema að þar voru verk allra nemenda sýnd, þarna var aðeins brot eða brotabrot af því sem fer fram í skólanum. Nú var verið að fjalla um þessa stórkostlegu (!) sýningu í sjónvarpinu og þá ákvað ég að eyða öllu því sem ég skrifaði hér á bloggið. Sennilega var þetta bara gott - nema stafsetningin.

2003-02-14T02:23:00.000-08:00

Í gær hafði ég EKKERT netsamband nema með því að nota símalínuna. Ég er með sítengingu frá Orkuveitunni og það hefur ekki gengið sem skyldi. (Reyndar virðast tæknimál ekki ganga upp hjá mér!) Svo voru eilífðar vandræði með lesarann fyrir myndavélina. Það er búið að kippa því í lag, þökk sé góðri þjónustu hjá BT-tölvum. Vandamálið reyndist vera að lesarinn virkaði bara í USB tengi vinstra megin á tölvunni en ekki aftan á tölvunni. Þetta hafði mér ALDREI dottið til hugar og reyndar engum hér heima sem allir hafa meiri hæfileka, þekkingu og þolinmæði á tölvusviði heldur en ég.
Ekkert heyrist frá Aco sem lofaði mér Dreamweaver forritinu. Svo ég er hálf bjargarlaus. Á einhver forrit? Ég hef prófað ÖLL netföng heimilisins án árangurs, forritið segir strax að 30 daga tíminn sé útrunninn. Þetta var stutt gaman....... Og NÚNA meðan ég er að skrifa þetta þá fatta ég hvers vegna forritið datt út. Sunnudaginn 2.febrúar vorum við að panta flugfar á netinu og það gekk ekki upp. Tölvan svaraði alltaf að við hefðum valið vitlausan dag. Við völdum réttan dag, en þegar við töluðum við þá deild hjá Flugleiðum sem sjá um netbóknair þá bentu þeir okkur á að prófa að athuga hvort klukkan og dagatalið í tölvunnu okkar væri í lagi. NEI, það var ekki og við lagfærðum það snarlega og bókuðum miða á Netinu. Strax eftir þetta datt forritið út. Er þetta ekki sennileg skýring? Mikið rosalega er ég ánægð með að hafa loks fundið líklega skýringu. Er það ekki dæmigert fyrir svona forngrip eins og mig að hafa vitlaust dagatal í tölvunni. Enda til hvers að hafa dagatal eða klukku í tölvu??? Í mínum huga er dagatal tengt pappír og myndum sem hangir uppi á vegg og ég nota bara úr og klukkur með skífum. Ég skil ekkert annað og hef ekkert tímaskyn gagnvart tölvuúrum.
Mikið var gott að skrifa þetta nú hef ég skiljanlega skýringu á forritahvarfinu hjá mér. En ég veit ekki hvort það er rétt skýring.

2003-02-11T07:12:00.000-08:00

Mikið er veðrið gott og það var hressandi að fara í göngutúr með Gerði grannkonu minni og samnemanda. Svo fékk ég ábendingu um slóð frá vinkonu minni og kollega og þar kom upp í hendurnar feikigóður vefur með mörgum atriðum sem nýtast í vefrall og margt annað í kennslu. EN þrátt fyrir ábendingar tókst ekki að setja upp USB port reader fyrir stafræna myndavél við tölvuna mína. Þetta hefur gengið eins og í sögu við aðrar tölvur heimilisins en þessi tölva er með Windows 2000 og innsetningardiskurinn passar ekki fyrir það. Mér var bent á að "fara bara á Netið og hlaða þaðan" en það fylgdi ekki hvert ég ætti að fara. Þetta litla atviksorð "bara" pirraði mig svakalega.

2003-02-10T13:48:00.000-08:00

Eins og sjá má þá hef ég lítið skrifað í bloggið í vikunni. Ég get ekki gert neitt nema að kvarta og þetta er e.t.v. ekki rétti vettvangurinn fyrir nöldur mitt. Ég er ennþá forritalaus og sítengingin virkar bara endrum og sinnum.
Ég hef svolítið spurt mig hvort ég lærði e-ð á laugardaginn í tölvustofunni í Kennó. Já, e-ð lærði ég t.d. að setja bakgrunn. Það var víst kennt fyrir löngu en ferlið er nægilega flókið til að maður þarf að æfa sig oft áður en ferlið festist í minni. En þá er maður farin að reyna að fylgjast með e-u öðru, gleymir bakgrunnunum og lærir aldrei annað. Ég upplifi mín eigin mistök í kennslu núna sem nemandi. Og svo líður mér eins og nemendum með dyslexíu hlýtur að líða þegar við kennararnir getum ekki útskýrt að gagni eða komið með aðferðir sem gagnast þeim. Aðferðir eru nefnilega mjög míkilvægar - en því miður vanræktar í skólakerfinu. Það er svo auðvelt að komast að rangri niðurstöðu þegar maður veit ekki hvaða aðferðir maður á að nota. Eins er auðvelt að villast ef maður hefur ekki kort til að fara eftir. (Að vísu þarf að læra að nota kort - það er líka ákveðin aðferð.) Hrifning mín fyrir uppgötvunarnámi er takmörkuð og sú aðferð hentar mér ekki. Sennilega er ég of gömul - ég hef sannarlega ekki tíma til að vera í einhverju uppgötvunarnámi.
Ég hef mikinn áhuga á að lesa um þá kennslufræði sem liggur til grundvallar fyrir kennslu í að nota tölvur. Ég er ekki að leita að kennslufræði tölvukennslu - heldur hvernig á að kenna að nota tölvur. Hér með auglýsi ég eftir bókatitlum og greinum til að lesa. Komið með ábendingar! Af öllum þeim greinum sem við lásum fyrir jól þá man ég sérstaklega eftir greininni: Six Stages for Learning to Use Technology eftir Anne L. Russell. Mér líður eins og nemanda á fyrsta eða öðru stigi sem fær kennslu miðað við að kunnáttan sé á fjórða, fimmta eða sjötta stigi. Það gengur ekki! Manni líður illa og vanlíðan auðveldar ekki nám. Og ég pípi á allt tal um að maður eigi að ganga í gegn um erfiðleikaferli til að ná tökum á þessari blessaðri tækni. (Þetta minnir á aldagamlar hugmyndir um að erfiðleikar séu til að herða fólk - nei takk!) Góðar, skýrar, hnitmiðaðar, markvissar og vel orðaðar skýringar og æfingar geta komið í veg fyrir mikla kvöl og pínu. Svo má huga að einföldum leiðum og aðferðum eða að einfalda útskýringar.
Nú er ég búin að nöldra svo mikið að ég held að nú sé komið nóg.

2003-02-06T01:25:00.000-08:00

Ég ætla að reyna að gleyma vandræðum mínum fram yfir helgi og snúa mér að vitrænum verkefnum. Tæknileg verkefni flokka ég ekki sem vitræn og það er tæknin sem er að svíkja mig.
Ég hlóð inn Dreamweaver skv. fyrirmælum og átti 27daga eftir af 30 daga skilmála þegar forritið ákvað skyndilega að vilja ekki þýðast mig og tilkynnti bara “trial expired” Ég er búin að hlaða því inn aftur á öll hugsanleg netföng sem ég kemst yfir. Það gengur eins og í sögu, ég fæ 30 daga afnot en um leið og ég ætla að reyna að nota það þá vill forritið ekki meir og þakkar fyrir samveruna. Ég fæ nýtt forrit frá Aco í næstu viku. Þetta er mjög pirrandi og miðaldra konur á fjaðurpennastiginu mega ekki við svona áföllum. Hefur einhver annar lent í svona?

2003-02-03T07:50:00.000-08:00

Ég ætla þrátt fyrir allt að gera enn eina tilraun við bloggið. Ekkert af því sem ég skrifaði frá því eftir hádegi 31. janúar hefur komið inn á bloggsíðuna. Svona þoli ég ekki. Á meðan ég ergi mig ætla ég að setja drög á nýju vefralli, ég sé að hið gamla er heppilegra sem vefleiðangur eða e-ð annað. Það er svo viðamikið. En hugmynd mín er að nemendur fræðist um elsta kvikmyndaver og elsta kvikmyndafélag í heiminum sem að sjálfsögðu er í Kaupmannahöfn. Mitt vefrally á að vera menningarmiðlun. Svo eiga þau að fletta upp á Nordisk Film Þegar ég gerði það sjálf kom í ljós að vefsíðan er "í viðgerð" svo bregðast krosstré sem önnur! Ég get svo sem haldið áfram án þess að hafa vefsíðuna tiltæka því ég þekki innihaldið en mig vantar nýjustu upplýsingar. Ég reyni að halda ró minni í bili.

2003-01-31T15:41:00.000-08:00

Þetta fór heldur ekki rétta boðleið og ég ætla að prófa aftur. Til hvers að halda vefdagbók ef hún birtist ekki á neinum vef. Eftirfarandi skrifaði ég í gærkvöldi:

Nú tryllist ég!!!!! Mest af því sem ég setti inn á bloggið í gær er ekki komið á vefsíðu-bloggið. Hvað svo sem maður kallar þetta. Hvað gerðist. Ég hef gert allt eins og til er ætlast. Svona þoli ég ekki! En það er ekki bara þetta sem er að angra mig. Þegar ég kom heim í dag og ætlaði að prufa það sem ég held að ég hafi lært í morgun þá kemur í ljós að Dreamweaver og FIreworks er dottið út. Ég hlóð því inn í tölvuna á mánudaginn og færði það inn á bloggið að ég hefði ástæðu til að vera stolt af afrekinu. Í gær stóð að ég gæti hafi forritið í 27 daga í viðbót. En í dag var tíminn útrunninn!!!!! Hefur einhver annar lent í þessu? Núna get ég ekkert gert. Dóttir mín sagði að það væri hægt að hlaða þessu inn aftur og notaði sitt eigin netfang. Hún virtist geta gert það en svo kom sama melding. Tíminn útrunninn!!! Ég þoli ekki svona vesen. Ég lít á þetta sem persónulegar ofsóknir tövunnar í minn garð til að koma í veg fyrir að ég stjórni henni.
Ég er löngu búin að gleyma hvernig átti að gera sites. Og það mun ekki batna með því að hafa ekki þetta fj... forrit næstu daga. Flugelda- forritið er líka dottið út. Tíminn útrunninn segja þeir. En það fór fyrir ofan garð og neðan hjá mér frá upphafi. Mér finnst mjög athyglisvert að vera í sporum nemanda þessa dagana. Ég er nemandinn sem bjástrar og rembist og ekkert gengur. Hjá yngri nemendum sem finna engin framför eða fá ekki fyrirmæli sem duga verður hegðunin slæm og það er mjög stutt í að ég fari að hegða mér illa.

2003-01-31T15:27:00.000-08:00

Svona líður mér. Ég er búin að gera öll tilskilin verkefni fyrir deadline eftir hálftíma en.......... vefsíðan er strand. Og ekki bætir að sítengingin mín slitnar þegar mest á reynir.

2003-01-31T15:07:00.000-08:00

Hugmyndir að vefrallý
Ég er með nokkrar hugmyndir að vefrallý - en ég veit ekki hvort þær ganga upp í þeirri mynd sem ég hugsa mér. Og að sjálfsögðu er ég alltaf að hugsa um að með tölvunotkuninni og vefrallinu eigi nemendur að beita erlendu máli. Ég sé að þetta er fyrst og fremst lestrarþjálfun hjá nemendum en áframhaldandi vinna út frá vefralli gæti falist í munnlegri notkun, skriflegum verkefnum o.fl. þ.h. Markmiðið með þessum hugmyndum mínum er menningarmiðlun (kulturformidling)
Vefrallý nr. 1 Hvad fejrer vi?
Nemendur leita að skýringum á dönskum hátíðardögum, hvers vegna eru þeir haldnir hátíðlegir, hvaða hefðir tengjast þeim og hvenær eru þessir hátíðardagar, eru þetta fastir vikudagar eða bundnir við dagsetningu? Margir danskir hátíðardagar eru þeir sömu og annars staðar í heiminum með svipaðar hefðir en svo eru líka til sérstakir danskir hátíðardagar. Fólk hefur t.d. lent í þeirri pínlegu aðstöðu að ætla að skreppa í búðir í Köben en þá var bara e-ð sem heitir storebededag. Hvað er það eiginlega? Ýmis svör fást með að slá upp stoerbededag á Google
Og ef það stendur mortensaften á dagatalinu - hvað á þá að gera eða borða????? Það má finna með sömu aðferð á sömu leitarvél.
Vefrallý nr. 2 Christian den niende, Europas svigerfar
Hvers vegna var hann kallaður "Europas svigerfar"? TIl þess þarf að lesa um karlinn, fletta upp börnum hans og skoða afdrif þeirra. Þetta rall er enn í mótun og hugmyndin varð eiginlega til af því ég fann kónginn óvænt þegar ég var að leita að e-u öðru á Google Það gæti verið að þetta sé vænlegra sem vefleiðangur en rall.
Vefrallý nr. 3 MAD
Hvert á maður að fara ef maður er sendur út í búð að kaupa, "spandauer" eða "gifler"? Er "Sol over Gudhjem" veðurlýsing? Hér er möguleiki á myndrænum svörum, en að öðru leyti renn ég blint í sjóinn með þetta. Og ég hef alltaf svo góða reynslu af Google að ég vænti þess að öll svörin fáist þar. Hér væri sennilega líka möguleiki á einhverjum síðum með uppskriftum eða að leita á heimasíðum veitingastaða. Það á ég eftir að prófa og skoða nánar möguleikana sem bjóðast. Verkefnið hlýtur að þurfa að aðlaga sig fáanlegurm upplýsingum eða er ekki svo?

2003-01-31T14:12:00.000-08:00

Framtíðarsýn.

Það er erfitt að spá og sérstaklega um framtíðina. Öll þau tæki sem við notum núna verða betrumbætt, auðveldari og ódýrari. Þetta virðist vera hin almenna þróun. Ég sé ekki fyrir mér almenna tölvuvæðingu í skólakerfinu, það er ekki nóg bara að kaupa fleiri tölvur og endurnýja reglulega. Það þarf grundvallarbreytingu á svo mörgum sviðum ekki síst viðhorfsbreytingu því skólinn er í eðli sínu íhaldssamur og þess vegna taka grundvallarbreytingar langan tíma. Ég spái því líka að eftir tíu ár munu enn finnast forngripir sem eiga erfitt með að tileinka sér tæknina. Það sem ég vonast eftir í framtíðarsýn minni er svolítið umburðarlyndi. Húrra fyrir öllum tækninýjungunum og þeim sem kunna að nýta sér þær. EN – ef menn verða ekki færir um að miðla af þekkingu sinni, hvort heldur það eru sölumenn tækja eða kennarar þá mun öll draumsýn breytast í martröð.

2003-01-31T12:37:00.000-08:00

Fáein orð um heimilistæknina, tæknina á vinnustað og hvernig mér nýtist þetta.

Þetta var eitt af verkefnunum sem við áttum að gera fyrir mánaðamót og ég ætla að fjalla um tæki og tækni sem við notum hér heima, tölvunotkun, símana og tæknina á vinnustað. Þá kem ég inn á nýjustu tæknina sem við á heimilinu reynum að tileinka okkur hvernig það tekst og að lokum svolítið mat á tæknilegri færni minni.

Heimilistæknin hjá sjónvarpssjúklingunum:
Hér á heimilinu eru flestir þeir hlutir sem hægt er að nota til að auðvelda sér lífið og spara tíma og orku. Bakaraofninn hreinsar sig sjálfur og ýmis önnur heimilistæki spara bæði handtök og mínútur. Það mætti halda að við séum sjónvarpssjúk. Við erum þrjú í heimili og fimm sjónvörp. Þau eru sum komin til ára sinna og öll af ódýrustu gerð en þrjú þeirra hafa textavarp sem við notum talsvert, aðallega til að skoða markatölur, flug til og frá landinu o.þ.h. Tvö sjónvörp hafa svolitla sérstöðu, þau eru bæði mjög lítil í eldrauðum plastkassa með handfangi. Annað er meir að segja þeim kostum búið að ganga fyrir batteríum þegar manni þóknast svo. Hitt trónir við matarborðið og hefur mátt þola matarslettur síðan 1986. Við þóttum mikið furðufólk að hafa sjónvarp í eldhúsinu en fleiri hafa hermt eftir okkur en hneykslast. Leikfélaga sonar míns varð starsýnt á sjónvarps-ögnina á eldhúsborðinu og sonur minn fór að útskýra að þetta væri sjónvarp en bara svart - hvítt. Leikfélaginn hlustaði furðu lostinn á þetta og blöskraði víst alveg þegar talað var um svart-hvítt sjónvarp því þá gall við í honum: "nei, það er rautt!"
Á heimilinu er eitt myndbandstæki af ódýrustu gerð en nokkuð við aldur. Við kaupum DVD diska en höfum ekki fengið okkur DVD spilara ennþá.
Sennilega erum við sjónvarpssjúk, því við erum bæði með Sjónvarpið og Stöð 2 og Skjá einn eftir að loftnetið var lagfært. Þegar heimsviðburðir eru á íþróttasviðinu höfum við tengst við Sýn og Fjölvarpinu eftir þörfum. Við erum ekki með Breiðbandið en ég verð fljót til að kaupa áskrift þegar hún býðst.

Tölvuvæðing heimilsins: .
Við erum með fjórar tölvur en aðeins tvær í notkun. Fyrsta Makkann fengum við 1989 og endurnýjuðum með öðrum Makka 1995. Ég hafði notað tölvu áður en ég eignaðist Síðan kom þetta eilífa "trúarbragðastríð" um Makka eða PC og núna er búið að pakka Makkanum en á skrifborðinu eru tvær fistölvur hlið við hlið, báðar í fullri notkun. Ég nota þær báðar í vinnu og náminu og sonur minn notar aðra til að leika sér. Hann kaupir og selur fótboltamenn og lætur Harry Potter geysast um skjáinn. Maðurinn minn snertir helst ekki tölvu heima. Dóttir mín sem er flutt að heiman skilur tölvuna aldrei við sig.
Við höfum notað tölvupóst síðan 1995 og það hefur gengið bærilega. Sérstaklega eftir að ég fór að vera vandlát á hvaða póst ég opna. Einu sinni fékk ég póst sem kostaði 25.000 kr í viðgerð á tölvunni. Brandarar í tölvupósti eru eitur í mínum beinum síðan þá! Netið nota ég aðallega til að leita að greinum, lesa dönsk dagblöð, skoða íbúðir með börnunum mínum og leita að gistingu fyrir ferðalög. Það er það einasta sem ég hef pantað og greitt í gegn um Netið. Heimabankar eru mjög hagkvæmir en við notum þá ekki, sennilega vegna þess að við höfum svo góðan þjónustufulltrúa í bankanum. Ég viðurkenni að ég hef ekki áhuga á að kaupa eitthvað á Netinu, mér er illa við að gefa upp kreditkortanúmer en það hefur þó komið fyrir.
Upp á síðakastið hefur mér þótt óþægilegt að hafa ekki sítengingu og í síðustu viku fékk ég sítengingu hjá Orkuveitunni og alla þessa viku haf ég verið í slitróttu sambandi við umheiminn. Mjög pirrandi og ekki traustvekjandi.

Ekkert líf án GSM:
Öll fjölskyldan er með GSM síma og við notum þá mjög mikið og höfum haft farsíma síðan 1997. (Reyndar veit hann litli sonur minn ekki að það er til einn sími viðbót sem er ætlaður honum.) Ég er EKKI með talhólf og mér leiðast talhólf. Annað hvort talar maður í símann, slekkur á honum eða sendir SMS. Ég sendi mikið SMS og er eldfljót að því. En í byrjun var það alls ekki svo - mér tókst ekki að senda SMS og fékk háðuglegar athugasemdir fyrir bragðið. Ég skikkaði dóttur mína til að skrifa NÁKVÆMLEGA niður lið fyrir lið hvernig ég ætti að senda SMS. Síðan var snepillinn brotinn saman og settur í hulstrið utan um símann og tekinn fram þegar átti að senda SMS. Í byrjun og lengi vel voru öll mín SMS bara með upphafsstöfum - ég kunni ekkert annað og hafði ekki áhuga á að læra hvað ætti að gera til að breyta stöfunum. Núna hef ég lært þetta og það var ekki með því að fikta heldur var mér sagt nákvæmlega hvað ég ætti að gera og þar sem ég kunni snepilinn utan að var hægt að bæta einum færniþætti við. Gamli síminn í hulstrinu fannst um daginn ásamt sneplinum og varð tilefni til margra brandara. Mér fannst þetta ekki fyndið, svona læri ég með minnisatriðum sem ég fylgi NÁKVÆMLEGA þangað til þau verða mér ósjálfráð. Það þýðir ekki að segja mér að fikra mig áfram og fikta í tölvu eða síma. Ég fikta aldrei, ég vil fá skýr og nákvæm fyrirmæli án útúrdúra. Þannig byrjaði ég að nota tölvupóst og það dugði. Ég væri ekki enn komin í samband ef ég hefði átt að fikra mig áfram.
Fram að þessu hefur heimilistæknin hlýtt mér nokkurn vegin. Reyndar hefur iðulega þurft að kalla til tölvufrík sem bjarga málum þegar ég kemst hvorki lönd né strönd í tölvunni minni. Vandamálið er sjaldnast alvarlegt en það sem stoppar mig af að nota tölvuna er alvarlegt í mínum augum.

Vinnan og tölvurnar:
Í vinnunni þeysist ég á milli stofa, aldrei í sömu stofu eða í kennslustofu sem á e-ð skylt við dönskukennslu eða tungumálakennslu. Í stofunni er tafla og krít og ef ég er heppin, myndbandstæki og sjónvarp meir að segja DVD spilarar í sumum stofum. Þegar ég lauk kennslu sl. vor fyrir orlofið mitt hafði mörgum tækjum verið stolið. Tölvum get ég dröslað inn í stofur á vagni og þar vantar oftast einhverjar snúrur og tengi. Ég sé á tölvupóstinum sem kemur til allra kennara skólans að þetta er viðvarandi vandamál. Snúrur, tengi og fjarstýringar hverfa og stundum líka tölvurnar. Á vinnustofunni minni sem ég deili með 3-4 örðum kennurum (hreinn lúxus!) er stór borðtölva og ein fistölva ásamt prentara. Nú fékk ég mér tölvu í vor keypta á e-m skólasamningi og til þess ætlast að ég taki tólið með í vinnuna tengi það myndvarpa (sem voru örfáir sl. vor) og noti á staðnum. Skanni er í kjallara skólans og ég kann ekki að nota hann. Hann er öðruvísi en sá sem ég er með hér heima en hann get ég aðeins notað að takmörkuðu leyti vegna þess að mig vantar nákvæmar fyrirskipanir fyrir hin ýmsu afbrigði sem skanninn býður upp á. Í svona nákvæmum fyrirmælum þarf líka að taka fram hversu lengi maður þarf að bíða eftir viðbrögðum tölvunnar. (Ég er mjög óþolinmóð að eðlisfari!) Hér á skrifborðinu mínu er ég með prentara og skanna og að auki tölvurnar tvær sem áður er getið. Aðstæður heima eru að mínu mati mun betri en á vinnustað.

Nýjasta tækni og vísindi:
Fyrir u.þ.b. tveimur árum fengum við okkur myndavél. Stafræna að sjálfsögðu. Ekkert mál bara "þessi snúra í tölvuna og svo koma myndir"!!! Það komu aldrei myndir, við lásum bæklingana á ýmsum tungumálum og alltaf átti þetta að vera jafn auðvelt. Það gleymdist bara að geta þess að til að fá myndirnar fram á skjáinn þurfti millistykki, í það skyldi kortið með myndunum fara og snúran úr þessu millistykki átti síðan að fara í tölvuna. Þá loksins fór þetta að ganga en áhuginn á nýju myndvélinni löngu rokinn út í veður og vind. (Einasti kosturinn við myndavélina er hvað hún er agnarlítil.) Svona leiðbeiningar eru dæmigerðar. Fólk sem lítið veit þykist geta leiðbeint þeim sem ekkert kunna. Sölumaðurinn hafði bara lært rulluna sína og leiðbeiningar / notkunarreglur með tækjum eru skrifaðar á sérstöku máli sem er óskiljanlegt á öllum þeim tungumálum sem maður hefur á valdi sínu.
Núna rétt áðan var ég að fá mér “Memorybird”. Það er ekki disklingadrif á nýju tölvunni minni og þess vegna er miklu betra að vera með svona USB – fídus! En til að setja hann upp fylgdi disklingur!!! Þá varð ég “frústreruð” og hringdi í son minn sem kann á þetta. Hann gat róað mig og sagt mér að ég þyrfti ekki að “installera” neinu af því tölvan væri með Windows 2000 en hann væri búinn að redda málum í eldri tölvunni. Af þessu dæmi má sjá að mín “frústrasjón” kemur áður en vandamálin birtast.

Mat:
Eins og sjá má er kunnátta mín ansi brotakennd og áhuginn liggur í möguleikunum en ekki tækninni. Ég hef t.d. ekki áhuga á snúrum “per se”. Mér finnst það taka á taugarnar að nota tölvur, ég þoli ekki þegar ég verð strand og tölvan vill ekki hlýða mér. Ég viðurkenni líka að þetta er vegna þess að ég kann ekki nægilega mikið og þyrfti að æfa mig miklu meir. EN ég viðurkenni ekki að vankunnátta mín sé vegna heimsku minnar og fáfræði.

2003-01-31T05:39:00.000-08:00

Eureka
Mér tókst að setja mynd inn. Fyrst misheppnaðist þetta og inn fór risastór mynd. Það var ekki fallegt. En það tókst að fjarlæga hana og setja minni. En þegar ég set á "view as web page" sést litla myndin ekki. Þetta var ekki auðvelt verk, ég þurfti að gera þessa lagfæringu margoft vegna þess að símasambandið (nýja fína (?) sítengingin mín) slitnaði í sífellu. En fátt er svo með öll illt. Núna held ég að ég kunni þetta, hversu lengi sem það varir.
Svo hef ég verið að bjástra við Dreamweaver ég er búin að gera eina síðu og einhverja möppu en ég get ekki tengt þetta. Mér finnst eins og eitthvað vanti í leiðbeiningarnar. Ef ég á að skilja leiðbeiningar verða þær að vera mjög skýrar, það duga ekkert annað en "Burda-leiðbeiningar" fyrir mig.

2003-01-30T07:49:00.000-08:00

Kynning:
Ég heiti Lovísa Kristjánsdóttir og er dönskukennari í MH
Ég er 52 ára gömul, gift og á þrjú börn og tvö barnabörn. Maðurinn minn heitir Mímir Arnórsson og er lyfjafræðingur og börnin eru Kristján, Sunna og Kári. Kristján er fornleifa- og þróunarmannfræðingur konan hans heitir Zulema og er frá Perú. Þau eiga Stellu sem verður bráðum tveggja ára og er á leikskóla og Símon sem er 9 mánaða. Sunna er að læra stjórnmálafræði og Kári er 10 ára og er í 5.R í Grandaskóla

Ég er búin að vera kennari í meir en 25 ár bæði í grunn- og framhaldsskóla. Ég er með BA próf í dönsku og sögu og hef eingöngu kennt dönsku í framhaldsskóla en í grunnskóla kenndi ég líka sögu. Ég lauk uppendis- og kennslufræði og tuttugu árum síðar, sumarið 2001 lauk ég MA - prófi frá Háskóla Íslands í mati á skólastarfi og hef unnið smávegis fyrir menntamálaráðuneytið við úttektir á mati í skólum. Meistaranámið tók ég með vinnu, en í vetur er ég svo heppin að vera í námsorlofi og þess vegna er ég í
Kennaraháskólanum

Ég held að ég hafi verið nokkuð iðin að sækja kennaranámskeið og hef verið á mörgum tölvunámskeiðum, því fyrsta fyrir fimmtán árum síðan og í hvert sinn sem einhver nýmæli á sviði tölvunotkunar komu fram þá var ég mætt á námskeið. Ég á að hafa lært að gera heimasíður, búa til vefleitarverkefni, nota töflureikni, búa til gagnvirk próf o.fl. en ég veit að ég kann ekkert af þessu. Hingað til hafa öll þessi námskeið verið ómarkviss og gagnslaus. Yfirferðin er of hröð of lítið um endurtekningar og fyrirmæli oftar en ekki óljós. Þegar svo til viðbótar kemur að tölvan frýs eða fær veirusýkingu þá er ekki á leiðindin bætandi. Þess vegna leiðast mér tölvur alveg óskaplega - en geri mér grein fyrir að án þeirra getum við ekki verið í dag.

2003-01-28T02:55:00.000-08:00

Þá er víst kominn tími til að huga að reglubundnum skrifum í boggbókina. Svona skrif eru bráðnauðsynleg, til að velta upp vandamálum, blása svolítið og láta í ljós reiði sína og einnig til að ígrunda það sem maður er að gera. Hafið þið lesið "The Reflective Practitioner" eftir Donald Schon? Það er ágætis bók, meir um það síðar.
Núna ætla ég að skrá það sem ég hef verið að gera í morgun. Sítengingin mín virkar og ég náði í Dreamweaver og Fireworks og hlóð því inn. Ég er nokkuð stolt af því. Svo prentaði ég út lexíurnar frá Salvöru. Á morgun ætla ég að reyna að koma hinum verkefnunum á koppinn. Vefrallið er tilbúið eða þannig, ég þarf sennilega að nota ramma fyrir það. Er það ekki voða flókið? Ég er búin að skrifa kynninguna og vangaveltur mínar um tæknina, en ég kem því ekki svo auðveldlega inn á bloggið. Það er skrifað í annarri tölvu (Word forritið datt út úr þessari!!!) og það er ansi mikið maus að koma því úr þeirri tölvu í þessa og senda svo. Má vera að ykkur hinum finnist það ekki vera neitt mál en fyrir mér er þetta flókið. Ég er sífellt að styrkjast í því að ég sé á fjaðurpennastiginu. Og satt best að segja líkar mér það ágætlega.
Og nú er ég búin að prófa að lagfæra þennan texta með því að ýta á "edit" það er snjallt þegar maður gerir innsláttarvillur.

2003-01-22T14:47:00.000-08:00

Svo átti víst að tengja - best að nota heimasíðuómyndina mína! Heimasíðan mín Vonandi tekst mér að hressa upp á þessa síðu sem var gerð á html námskeiði árið 2000 - það var súper hraðferðarnámskeið en ég hefði þurft hægferð í heimasíðugerð!

2003-01-22T14:11:00.000-08:00

Hér kemur nýja "lúkkið"´. Dóttir mín mótmælti því að ég væri "Avocado" á bloggsíðunni.

2003-01-22T13:58:00.000-08:00

Þvílík hörmung að reyna að muna hvað á að gera í þessu bloggi, Mér er sagt að þetta sé "idíót prúf" en sá sem heldur því fram þekkir mig ekki.

2003-01-22T13:55:00.000-08:00

gfdtdtgd

2003-01-21T03:56:00.000-08:00

Þetta er önnur prufa gerð heima - sú fyrri hafði þau áhrif á tölvuna mína að ég kemst ekki lengur í netsamband. (Tölvan vill ekki taka lykilorðið mitt lengur) Ég hugsa því "Blogger" þegjandi þörfina. Vonandi lokar þetta blogg ekki á þennan tölvugarm.

2003-01-18T05:26:00.000-08:00

Eg er nemandi í Kennaraháskóla Íslands

2003-01-18T05:16:00.001-08:00

Þetta er önnur prufa á dagbókinni sem ég ætla að breyta núna þá verður þetta þriðja prufa

2003-01-18T05:16:00.000-08:00

Þetta er fyrsta prufa á dagbókinni